تورغا چىققىلى بولىدىغان كۆز ئەينەك بارلىققا كەپتۇ

 

   بۈگۈنكى كۈندە تېخنىكا تەرەققىياتى كۈنسېرى يېڭىلىنىپ، نۇرغۇنلىغان بۇيۇملارمۇ بارغانسېرى ئىخچاملىشىشقا، بارغانسېرى قولايلىقلىشىشقا قاراپ يۈزلىنىۋاتىدۇ. يېقىندا ئىسرائىلىيدىكى بىر شىركەت بىر خىل يېڭى پاسوندىكى پۈتۈنلەي يېڭىچە كۆز ئەينەكنى تەتقىق قىلىپ ياساپ چىققان بولۇپ، كىشىلەر بۇنى تاقاپ، يول يۈرگەچ كىنو كۆرەلەيدىكەن، ئېلېكترونلۇق ئۇيۇنچۇق ئوينىيالايدىكەن، ھەتتا يەنە تورغا چىقىپ پوچتا يوللانمىلىرىنى يوللىيالايدىكەن.

  ئەنگىلىيە "كۈندىلىك پوچتا گېزىتى" نىڭ 13- يانۋاردىكى خەۋىرىگە قارىغاندا، Lumus ناملىق بۇ شىركەت مەخسۇس ئەڭ ئىلغار كۆرۈش تېخنىسكى ساھەسىدە تەتقىقات خىزمىتى بىلەن شۇغۇللىنىدىغان بولۇپ، يېقىندا، "PD-18-2" ئىسىملىك يېڭى بىر مەھسۇلاتنى ياساپ چىققان. بۇ يېڭى مەھسۇلات قارىماققا ئادەتتىكى كۆز ئەينەك بىلەن پەرقسىزدەك كۆرۈنىدۇ، ئەمما ئىشلەتكۈچى بۇ كۆز ئەينەكنى تاقىغاندىن كېيىن بىر تەرەپتىن يول يۈرگەچ يەنە بىر تەرەپتىن يۇقىرى سۈپەتلىك رەڭگارەڭ ئېكرانلاردىن بەھرىمان بولالايدۇ.

  "PD-18-2" نىڭ پرىنسىپى بولسا بىر مىكرو كۆرسىتىش ئېكرانى ئارقىلىق سۈرەت دېتاللىرىنى توپلاپ، ئاندىن بۇلارنى كۆز ئالمىسىغا چۈشۈرۈپ، دەرىجىدىن تاشقىرى كۆرۈش ئۇچۇر گرافى كارتىسى (SVGA) ئۇسۇلىدىن پايدىلىنىپ چوڭ بىر مەۋھۇم تەسۋىرنى ھاسىل قىلىشتىن ئىبارەت.

  ئەمەلىيەتتە Lumus شىركىتى ئىلگىرى بازاردا بۇنىڭغا ئوخشاپ كېتىدىغان بىر ئەۋلاد مەھسۇلاتلارنى سېلىپ بولغان بولۇپ، ئاساسلىقى مەخسۇس كەسپىي زاتلار ۋە ھەربىيلەرگە سېتىپ بەرگەن، ئەمما ئىككىنچى ئەۋلاد مەھسۇلاتنىڭ كۆرۈنەرلىك ئەۋزەللىكى بار: يەنى يېڭى مەھسۇلاتقا ئىشلىتىلگەن يېرىم ئۆتكۈزۈشچان لىنزا «كۆرۈش سېزىمىنى كۈچەيتىش« ئىقتىدارىغا ئىگە بولۇپ، بۇنى ئىشلەتكۈچى سۈرەت كۆرگەن ۋاقىتتا نورمال كۆرۈش دائىرىسى تەسىرگە ئۇچرىمايدۇ.